&#34;Sog'lom avlod uchun&#34;

Article source: http://uza.uz/uz/society/20774/

Oqila va orasta qizlar

admin — Wed, 22 Feb 2012 12:41:11 +0000

Oqila va orasta qizlar

O‘zA, Nazokat Usmonova, 22.02.2012 13:50

Prezidentimiz Islom Karimov 2011 yilning asosiy yakunlari va 2012 yilda O‘zbekistonni ijtimoiy-iqtisodiy rivojlantirishning ustuvor yo‘nalishlariga bag‘ishlangan Vazirlar Mahkamasi majlisidagi ma’ruzasida jamiyatimizning asosiy bo‘g‘ini bo‘lgan oila institutini yanada mustahkamlash va rivojlantirish, xotin-qizlar, opa-singillarimiz uchun yanada keng imkoniyatlar yaratish, jismonan sog‘lom, ma’nan yetuk va barkamol avlodni tarbiyalash kabi muhim masalalar mamlakatimizda hamisha ustuvor ahamiyat kasb etayotganini alohida ta’kidladi.

Bu jihatlar qizlarning bilim olishi va kasb-hunar egallashi uchun sharoit yaratish, salomatligini mustahkamlash, tibbiy madaniyatini oshirish, oila va jamiyat oldidagi mas’uliyatini kuchaytirish kabi ezgu ishlarda ham o‘zining yorqin ifodasini topmoqda.

Davlatimiz rahbarining 2004 yil 25 mayda qabul qilingan “O‘zbekiston Xotin-qizlar qo‘mitasi faoliyatini qo‘llab-quvvatlash borasidagi qo‘shimcha chora-tadbirlar to‘g‘risida”gi farmoni mamlakatimizda ayollarni ijtimoiy-huquqiy jihatdan qo‘llab-quvvatlash, ularning kasb, jismoniy, ma’naviy va intellektual saviyasini yuksaltirishga oid ishlarni yanada yuqori bosqichga olib chiqishda muhim dasturilamal bo‘lmoqda. Ayni paytda xotin-qizlarning salomatligini saqlash, har jihatdan mustahkam oilani shakllantirish, ayollar va oila sportini rivojlantirish, sog‘lom turmush tarzini targ‘ib etish bo‘yicha amaliy ishlar ko‘lami tobora kengayib borayotir.

O‘zbekiston Xotin-qizlar qo‘mitasi tomonidan mamlakatimizning turli hududlarida ayollarning mehnat va o‘qish sharoitlarini yanada yaxshilash, ularni muntazam yuqori malakali tibbiy ko‘rikdan o‘tkazish, oilalar, mehnat jamoalari, mahallalar, ta’lim muassasalarida milliy an’ana va urf-odatlarimizning mazmun-mohiyatini to‘g‘ri tushuntirish, axloqiy-tarbiyaviy ishlarni yanada takomillashtirish masalasiga alohida e’tibor qaratilmoqda.

Qo‘mita tomonidan o‘tkazilayotgan turli ijtimoiy aksiyalar, ma’rifiy loyihalar, sport musobaqalari, spartakiadalar jamiyatimizda sog‘lom turmush tarzi g‘oyalarini qaror toptirish, qizlarning bo‘sh vaqtini mazmunli tashkil etish, ularning o‘z salomatligiga bo‘lgan mas’uliyatini yanada oshirishga xizmat qilmoqda. Ta’lim maskanlari, mahallalar, korxonalardagi xotin-qizlar qo‘mitasi boshlang‘ich tashkilotlari faoliyatini davr ruhiga mos tarzda takomillashtirishga doimiy e’tibor qaratilmoqda.

Bugungi kunda mamlakatimizdagi o‘rta, o‘rta maxsus, kasb-hunar va oliy ta’lim dargohlarida “Orasta qizlar” to‘garaklari tashkil etilmoqda. Bundan ko‘zlangan asosiy maqsad milliy an’ana va qadriyatlarimizning mazmun-mohiyatini qizlarga to‘g‘ri tushuntirish, yoshlar qalbi va ongida o‘z salomatligi, ularning oila, jamiyat oldidagi mas’uliyati va burchini anglatish, tibbiy madaniyatini yuksaltirish, sog‘lom oilani shakllantirishga doir bilim va ko‘nikmalari yanada mustahkamlashdan iboratdir.

– Kollejimizda qizlarning ma’naviy-axloqiy tarbiyasiga alohida e’tibor qaratilmoqda, – deydi poytaxtimizning Olmazor tumanidagi politexnika kasb-hunar kolleji direktorining o‘rinbosari Saida Rasulova. – Qariyb uch yuz nafar qizning ota-onalari, mahalla faollari, pedagoglar, shifokor-mutaxassislar, psixolog va huquqshunoslar hamkorligida olib borilayotgan targ‘ibot-tushuntirish ishlari samarasida qizlarni erta turmushga uzatish, yaqin qarindoshlar o‘rtasida oila qurish kabi salbiy holatlarning oldi olinmoqda. “Orasta qizlar” to‘garagi mashg‘ulotlarida qizlarning faol ishtirok etayotgani natijasida ular o‘z salomatligi, sog‘lom oilani shakllantirish, barkamol avlodni voyaga yetkazishga doir bilimini yanada boyitmoqda.

Kollejda tashkil etilgan o‘quv, badiiy ijodiyot, sport-sog‘lomlashtirish to‘garaklari o‘quvchi-qizlarning bo‘sh vaqtini to‘g‘ri va samarali o‘tkazish, salomatligini muhofazalash, yoshlar ongu shuurida ezgu g‘oyalarni mustahkam qaror toptirishda alohida ahamiyat kasb etmoqda.

– Barcha qizlar darsdan bo‘sh vaqtida shaxmat, shashka, qo‘l to‘pi, voleybol, stol tennisi, basketbol singari to‘garaklarda shug‘ullanishni juda yoqtiradi, – deydi mazkur kollejning 2-kurs o‘quvchisi Muslima Qobilova. – Bu salomatligimizni mustahkamlashda juda muhim. Shifokorlar, huquqshunos va psixologlar, faol xotin-qizlar ishtirokidagi uchrashuvlarda esa mamlakatimizda turli jabhalarda olib borilayotgan islohotlarning mazmun-mohiyatini yanada chuqurroq bilib olmoqdamiz.

To‘kis va fayzli xonadonga beka, sog‘lom va barkamol farzandlarga ona bo‘lish barcha qizlarning qalbidagi beg‘ubor orzudir. Buning uchun ular kollejda berilayotgan o‘rta maxsus, kasb-hunar ta’limini to‘liq egallashi, muayyan soha bo‘yicha yetuk malakali mutaxassis bo‘lib yetishishi kerak. Hayotda o‘z o‘rnini topish, sog‘lom oilani shakllantirish, ma’nan va jismonan komil o‘g‘il-qizlarni tarbiyalash ko‘p jihatdan ilm-ma’rifatli, kasb-hunarli, hayotda oqu qorani farqlaydigan, mustaqil, teran va sog‘lom fikrli yoshlar qo‘lidadir.

So‘nggi yangiliklar:

Article source: http://uza.uz/uz/society/20776/

Axborot sohasi taraqqiy etmoqda

admin — Wed, 22 Feb 2012 12:41:10 +0000

Axborot sohasi taraqqiy etmoqda

O‘zA, Sardor Tojiyev, 22.02.2012 13:56

O‘zbekiston Milliy matbuot markazida mamlakatimiz ommaviy axborot vositalari, nashriyotlar va matbaa korxonalarining rivojlanish yo‘nalishlariga bag‘ishlangan matbuot anjumani bo‘lib o‘tdi.

Tadbir O‘zbekiston matbuot va axborot agentligi tomonidan tashkil etildi.

Ommaviy axborot vositalari fuqarolik jamiyati institutlari tizimini shakllantirish, mamlakatni modernizatsiya va isloh qilish, fuqarolarning siyosiy, ijtimoiy faolligini oshirish, amalga oshirilayotgan islohotlarning mazmun-mohiyatini aholining keng qatlamlariga yetkazish, inson huquq va erkinliklarini ta’minlashda muhim o‘rin tutadi. Prezidentimiz Islom Karimov rahnamoligida mamlakatimiz axborot bozori ishtirokchilarining moddiy-texnik bazasini mustahkamlash, zamonaviy axborot-kommunikatsiya texnologiyalari bilan jihozlash, ularning jahon standartlari darajasida faoliyat yuritishlari uchun zarur shart-sharoitlarni yaratishga alohida e’tibor qaratilmoqda.

Davlatimiz rahbari tomonidan ilgari surilgan Mamlakatimizda demokratik islohotlarni yanada chuqurlashtirish va fuqarolik jamiyatini rivojlantirish konsepsiyasida “Ommaviy axborot vositalari to‘g‘risida”, “Axborot erkinligi prinsiplari va kafolatlari to‘g‘risida”gi qonunlar va boshqa bir qator qonunchilik hujjatlariga tegishli o‘zgartish va qo‘shimchalar kiritish bo‘yicha aniq choralar belgilab berilgan.

Ayni paytda ommaviy axborot vositalari faoliyati samaradorligini oshirish va iqtisodiy manfaatlarini himoya qilishga yo‘naltirilgan “Ommaviy axborot vositalari faoliyatining iqtisodiy asoslari to‘g‘risida”, “Ommaviy axborot vositalarini davlat tomonidan qo‘llab-quvvatlash kafolatlari to‘g‘risida”, “Teleradioeshittirishlar to‘g‘risida”gi qonunlarni ishlab chiqish va qabul qilish zarur.

Matbuot anjumanida O‘zbekiston matbuot va axborot agentligi Bosh direktori Bobur Alimov ko‘rilayotgan ana shunday chora-tadbirlar samarasida mamlakatimizda ommaviy axborot vositalari, nashriyot va matbaa kompaniyalarining soni ortib, ish sifati yaxshilanib borayotganini ta’kidladi. Agar 1991 yilda O‘zbekistonda 395 ommaviy axborot vositasi faoliyat ko‘rsatgan bo‘lsa, 2012 yilning 1 yanvariga kelib ushbu ko‘rsatkich 1254 ga yetdi. 706 ta gazeta, 255 ta jurnal, 16 ta axborot bulleteni, 4 ta axborot agentligi, 64 telekanal va 26 radiokanal, 173 vebsayt shular jumlasidandir.

Shu bilan birga, yil sayin nodavlat axborot vositalarining soni ko‘payib bormoqda – bugungi kunda bu ko‘rsatkich 739 tani tashkil etmoqda.

Tadbirda O‘zbekiston Respublikasining “Noshirlik faoliyati to‘g‘risida”gi qonuni, Vazirlar Mahkamasining 2004 yil 11 iyunda qabul qilingan “Noshirlik faoliyatini litsenziyalash to‘g‘risidagi Nizomni tasdiqlash haqida”gi qarori va boshqa hujjatlar asosida mamlakatimizda noshirlik-poligrafiya faoliyati ham rivojlanib borayotgani qayd etildi.

Davlatimiz rahbarining 2011 yil 30 dekabrda qabul qilingan “Ommaviy axborot vositalarini yanada rivojlantirish uchun qo‘shimcha soliq imtiyozlari va afzalliklar berish to‘g‘risida”gi qarori mamlakatimiz ommaviy axborot vositalari, nashriyotlar va matbaa korxonalarini rivojlantirishda yangi bosqichni boshlab berdi. Ushbu qarorga muvofiq, ommaviy axborot vositalari tahririyatlari va nashriyotlar ijtimoiy-siyosiy hamda bolalar adabiyotini, imkoniyatlari cheklangan shaxslar uchun adabiyotlarni sotishdan olingan foydadan foyda solig‘ini hamda obodonlashtirish va ijtimoiy infratuzilmani rivojlantirish solig‘ini to‘lashdan besh yil muddatga ozod etildi.

Matbuot anjumanida jurnalistlar axborot sohasini isloh qilish bo‘yicha o‘zlarini qiziqtirgan savollarga javob oldi.

So‘nggi yangiliklar:

Article source: http://uza.uz/uz/society/20777/

Qalb qo‘ridan yaralayotgan mahsulotlar

admin — Wed, 22 Feb 2012 12:41:09 +0000

Qalb qo‘ridan yaralayotgan mahsulotlar

O‘zA, Sayyora Shoyeva, 22.02.2012 16:51

Davlatimiz bayrog‘i – muqaddas. Zero, undagi har bir rang, har bir belgi chuqur ma’no-mazmunga ega.

Ushbu milliy timsolimizni hurmat qilish, uni tasvirlash va o‘rnatishda belgilangan tartib-qoidalarga rioya etish burchimizdir. Shu bois, davlat bayrog‘ini tikish va tayyorlash katta mas’uliyat talab etadi.

Toshkent shahrida faoliyat ko‘rsatayotgan “A’lo omad rivoj” mas’uliyati cheklangan jamiyati 2000 yil o‘tkazilgan tenderda g‘olib chiqib, O‘zbekistonning davlat bayrog‘ini tikish sharafiga muyassar bo‘ldi.

– Yurtimiz bayrog‘i hilpiraganda ko‘nglimiz g‘urur-iftixorga to‘ladi, – deydi mazkur jamiyat rahbari Maxburaxon Qodirova. – Ana shu iftixor tuyg‘usi bizni o‘z ishimizga mas’uliyat bilan yondashishga, davlatimiz bayrog‘ini jahon andozalariga mos, barcha qonun talablariga rioya qilgan holda tayyorlashga undaydi.

Korxonamizda dastlab turli hajmdagi 4-5 ming donagacha bayroq tikkan bo‘lsak, hozir 10 ming donagacha shunday mahsulot tayyorlash imkoniyati mavjud. Ular orasida stol ustiga qo‘yiladigan eng kichik bayroqchadan to 25×80 metr kattalikdagi bayroqlargacha bor.

Joriy yilda Londonda bo‘ladigan Olimpiya o‘yinlarida ishtirok etish uchun o‘tkazilayotgan saralash musobaqasida to‘p surayotgan O‘zbekiston olimpiya terma jamoasi futbolchilariga Avstraliya vakillari bilan bo‘ladigan o‘yin oldidan davlatimizning 25×80 metr o‘lchamdagi bayrog‘ini sovg‘a qildik. Bunday qo‘llab-quvvatlashdan ruhlangan futbolchilarimiz 2:0 hisobida g‘alaba qozondi.

Mamlakatimizda kichik biznesni rivojlantirish, jahon standartlariga mos mahsulotlar ishlab chiqarish, yangi ish o‘rinlari yaratish uchun barcha shart-sharoitlar yaratilmoqda. Xususan, ishbilarmon ayollarni qo‘llab-quvvatlash, xotin-qizlar o‘rtasida tadbirkorlikni rivojlantirishga alohida e’tibor qaratilayotir.

Davlatimiz rahbarining 2004 yil 25 mayda qabul qilingan “O‘zbekiston Xotin-qizlar qo‘mitasi faoliyatini qo‘llab-quvvatlash borasidagi qo‘shimcha chora-tadbirlar to‘g‘risida”gi farmoni ayollarning davlat va jamiyat qurilishidagi ishtirokini yanada faollashtirish, o‘z qobiliyat va salohiyatini namoyon etishi uchun keng imkoniyatlar yaratishda muhim omil bo‘lmoqda.

Maxburaxon Qodirova 1996 yilda Olmazor tumani Yangi sebzor mahallasida “Maxbura-Muyassar” o‘quv markazini tashkil etib, xotin-qizlarga tikuvchilik, pazandalik, parda tikish, qandolatchilik sirlarini o‘rgatish, kam ta’minlangan oilalar farzandlarini bepul o‘qitish, “Ustoz-shogird” an’analarini davom ettirishni yo‘lga qo‘ydi.

O‘sha yili tadbirkor tikuvchilik sexini tashkil etdi. Bu yerda dastlab ikki kishi ishlagan bo‘lsa, hozir mas’uliyati cheklangan jamiyatga aylantirilgan korxonada 25 tikuvchi va 60 kasanachi faoliyat yuritayotir.

Korxonada bayroqlardan tashqari qariyb sakson turdagi, turli bichim va o‘lchamdagi kiyimlar, pardalar, yotoqxona jihozlari, ko‘rpa-yostiq jildlari ham tayyorlanmoqda. Ayollar, erkaklar, bolalar kiyimlari, maktab formalari, turli kasb egalari uchun maxsus kiyim-kechaklar tayyorlanmoqda.

Ishlab chiqarish sohasida o‘tkazilayotgan tender savdolari mamlakatimizda raqobatni rivojlantirish, tadbirkorlarni qo‘llab-quvvatlashda muhim omil bo‘lmoqda. “A’lo omad rivoj” mas’uliyati cheklangan jamiyati ham ushbu tanlovlarda faol ishtirok etib kelmoqda. Korxona 2011 yili milliy matolardan nimchalar, turli o‘lchamdagi sumkalar tikish imkoniyatiga ega bo‘ldi. Shuningdek, maktab va akademik-letsiy o‘quvchilari uchun maxsus kiyim-boshlar tayyorlanmoqda.

Korxona Olmazor yengil sanoat kasb-hunar kolleji bilan faol hamkorlikni yo‘lga qo‘ygan. O‘tgan yili mazkur kollejda tahsil olib, amaliyot o‘tagan 5 nafar o‘quvchi uch tomonlama shartnoma asosida ishga qabul qilindi. Joriy yilda yana o‘nga yaqin yoshlar amaliyot o‘tamoqda. Mazkur kollejning ikkinchi bosqich o‘quvchisi Zahro Temirova – ulardan biri.

– Bolaligimdan tikuvchilikka qiziqaman, – deydi Zahro. – Kollejda ham shu yo‘nalish bo‘yicha tahsil olyapman. Korxonada amaliyot o‘tash jarayonida ko‘p narsalarni o‘rgandim.

Mahsulotlari sifati bilan xaridorlar e’tiborini tortayotgan korxona 2011 yili 45 million so‘mlik imtiyozli kredit oldi. Buning evaziga yangi tikuvchilik dastgohlari xarid qilinib, qo‘shimcha 12 ish o‘rni ochildi.

– Ko‘rsatilayotgan e’tibor, g‘amxo‘rlik tufayli biz, ayollar oila, ro‘zg‘or bilan birga tadbirkorlikni ham uddalayotganimizdan xursandmiz, – deydi M.Qodirova. – Farzandlarim el koriga yaraydigan insonlar bo‘lib voyaga yetdi. Hozir ularning har biri o‘zining doimiy ishiga ega. Bu mamlakatimizda tadbirkorlarni qo‘llab-quvvatlash, oilani mustahkamlash, unib-o‘sib kelayotgan yosh avlodni barkamol insonlar etib voyaga yetkazish uchun ko‘rsatilayotgan doimiy e’tiborning amaldagi samaralaridir.

So‘nggi yangiliklar:

Article source: http://uza.uz/uz/society/20780/

Bolalar salomatligi – doimiy e’tiborda

admin — Wed, 22 Feb 2012 12:41:07 +0000

Bolalar salomatligi – doimiy e’tiborda

O‘zA, M. Sulaymonov, 22.02.2012 17:01

Mamlakatimizda Prezidentimiz Islom Karimov rahnamoligida sog‘lom va barkamol avlodni tarbiyalash, ularni har tomonlama qo‘llab-quvvatlash borasida keng ko‘lamli ishlar amalga oshirilmoqda.

Yoshlarning sog‘lom voyaga yetishida to‘g‘ri ovqatlanish muhim o‘rin tutadi. Shuning uchun ham ta’lim muassasalarida o‘quvchilarning sifatli va to‘g‘ri ovqatlanishini ta’minlashga alohida e’tibor qaratilmoqda.

O‘zbekiston Respublikasi Vazirlar Mahkamasining 2010 yil 20 avgustda qabul qilingan “Ta’lim muassasalarida sog‘lom ovqatlanish shart-sharoitlarini yaxshilash chora-tadbirlari to‘g‘risida”gi va 2011 yil 14 oktabrda tasdiqlangan “Bolalarni tarbiyalashni takomillashtirishga, sog‘lom va barkamol avlodni shakllantirishga doir qo‘shimcha chora-tadbirlar to‘g‘risida”gi qarorlari bu boradagi ishlarni takomillashtirishda muhim omil bo‘lmoqda.

Ushbu hujjatlar ijrosi yuzasidan Farg‘ona viloyatidagi ta’lim muassasalari, mutasaddi idora va tashkilotlar, viloyat Davlat sanitariya-epidemiologiya nazorati markazi tomonidan ham muayyan ishlar amalga oshirilmoqda.

– Ta’lim muassasalari oshxonalari uchun oziq-ovqat mahsulotlarini yetishtirish, tayyorlash, qayta ishlash, yetkazib berish, saqlash, tashish va sotish bo‘yicha muayyan tartib o‘rnatilgan, – deydi viloyat Davlat sanitariya-epidemiologiya nazorati markazi bosh shifokori E. Malikov. – Maktablarda sotish uchun taqiqlangan mahsulotlar ro‘yxati tuzildi. O‘tgan yili viloyatimizdagi ta’lim maskanlari oshxonalarida bolalar uchun tayyorlanadigan oziq-ovqatlardan bakteriologik xavfsizlik ko‘rsatkichlarini aniqlash uchun namunalar olinib, tekshiruvdan o‘tkazildi. Tekshiruv natijasiga ko‘ra, bolalar sog‘ligiga salbiy ta’sir ko‘rsatuvchi turli konservantlar va sintetik qo‘shimchalar bo‘lgan oziq-ovqat mahsulotlarini sotish taqiqlandi.

Ta’kidlash joizki, barcha, jumladan, o‘quv dargohlarining oshxona va bufetlarida tayyorlanayotgan oziq-ovqatlar bolalar sog‘ligiga zararli ta’sir ko‘rsatmasligi, to‘yimli, kimyoviy tarkibi va bakteriologik jihatdan foydali bo‘lishi shart. Shuningdek, ularning narxi nisbatan arzon bo‘lishi, oziq-ovqatlarni sotish jarayonida sanitariya-gigiyena qoidalariga qat’iy rioya etilishi kerak.

Hozirgi kunda viloyatdagi ta’lim maskanlarida 860 oshxona va bufetlar ishlab turibdi. Maktablarda ovqatlanish sifatini oshirish maqsadida tender asosida tanlab olingan tadbirkorlik subyektlari faoliyat ko‘rsatmoqda. Bugungi kunda mazkur ta’lim maskanlaridagi oshxonalarda maktab o‘quvchilarini issiq ovqat, boshlang‘ich sinf o‘quvchilarini sutli va temir moddasiga boy qandolat mahsulotlari bilan ta’minlash ishlari talab darajasida yo‘lga qo‘yilgan. Zero, ta’lim muassasalarida o‘quvchilarning sog‘lom ovqatlanishini tashkil etish yoshlarning sog‘lom va barkamol bo‘lib voyaga yetishiga ko‘maklashadi.

So‘nggi yangiliklar:

Article source: http://uza.uz/uz/society/20781/

Зангиота тумани Улугбек КВПда

admin — Wed, 22 Feb 2012 04:38:17 +0000

21 феврал куни худудлараро тиббий ижтимоий кўчма бригадаси томонидан Зангиота тумани Улугбек КВПда жами 127 нафар ахоли тиббий кўрикдан ўтказилди. Шундан: – 76 нафар аёллар; – 52 нафар фертил ёшидагилар; – 14 нафар болалар, – 12 нафар ногиронлар; – 3 нафар ётиб колганлар; – 38 нафар УЗИ кўригидан ўтган; – 15 нафар ЭКГ кўригидан ўтган; – 98та лаборатория тахлили ўтказилди; – 57та мурувват ёрдами кўрсатилди, – Бўлажак она учун маслахат мавзуда 27 нафар иштирокчилар ўртасида лекция ўкилди.

Maqsad – mulkiy munosabatlarni takomillashtirish

admin — Tue, 21 Feb 2012 11:57:47 +0000

Maqsad – mulkiy munosabatlarni takomillashtirish

O‘zA, E. Yodgorov, 20.02.2012 18:40

Buxoro shahrida “Xususiy mulkni himoya qilish va mulkdorlar huquqlarining kafolatlari to‘g‘risida”gi O‘zbekiston Respublikasi qonuni loyihasi muhokamasiga bag‘ishlangan davra suhbati bo‘lib o‘tdi.

O‘zbekiston Respublikasi Oliy Majlisi Qonunchilik palatasining Budjet va iqtisodiy islohotlar qo‘mitasi, Davlat mulkini boshqarish davlat qo‘mitasi va O‘zLiDeP fraksiyasi hamkorligida tashkil etilgan tadbirda deputatlar, ekspertlar, huquqshunoslar, tadbirkorlar, viloyat huquq-tartibot idoralarining mas’ul xodimlari, jurnalistlar ishtirok etdi.

Davra suhbatida O‘zbekiston Respublikasi Davlat mulkini boshqarish davlat qo‘mitasi raisining birinchi o‘rinbosari S.G‘afforov, Oliy Majlis Qonunchilik palatasi deputatlari N.Alimov, M.Tursunov va boshqalar mamlakatimizda xususiy mulkning huquqiy himoyasini tashkil etishga qaratilgan qonunchilik bazasini takomillashtirish ishlari izchil davom ettirilayotganini alohida ta’kidladi. “Xususiy mulkni himoya qilish va mulkdorlar huquqlarining kafolatlari to‘g‘risida”gi qonun loyihasining ishlab chiqilishi va uning joylarda keng muhokama qilinayotgani ushbu hujjatni yanada takomillashtirishda muhim ahamiyat kasb etmoqda.

Prezidentimiz Islom Karimovning “Mamlakatimizda demokratik islohotlarni yanada chuqurlashtirish va fuqarolik jamiyatini rivojlantirish konsepsiyasi” ma’ruzasida belgilab berilgan vazifalar asosida ishlab chiqilgan ushbu qonun loyihasi xususiy mulk huquqini amalga oshirish, mulkdorlarning huquq va manfaatlarini himoya qilish, mulk daxlsizligini ta’minlashning kafolatlari bilan bog‘liq munosabatlarni tartibga solishga qaratilgan. Uni tayyorlashda keyingi yillarda vujudga kelgan mulkiy munosabatlar, qonunchiligimizdagi o‘zgarishlar, xalqaro qonunchilik talablari hisobga olindi.

Joylarda keng muhokama etilayotgan mazkur yangi qonun loyihasi mulkiy munosabatlarni yanada takomillashtirish va samaradorligini oshirishga xizmat qiladi.

Tadbir ishtirokchilari “Xususiy mulkni himoya qilish va mulkdorlar huquqlarining kafolatlari to‘g‘risida”gi O‘zbekiston Respublikasi qonuni loyihasida belgilangan me’yorlar bilan tanishtirildi.

Davra suhbatida yangi qonun loyihasining ahamiyati va mohiyati ochib berildi, uni yanada takomillashtirish bo‘yicha fikr-mulohaza va takliflar bildirildi.

So‘nggi yangiliklar:

Article source: http://uza.uz/uz/society/20754/

Aviakassirlar hushyorlikka chaqirildi

admin — Tue, 21 Feb 2012 11:57:46 +0000

Aviakassirlar hushyorlikka chaqirildi

O‘zA, M.Mametova, 20.02.2012 21:14

“O‘zbekiston havo yo‘llari” milliy avikompaniyasining havo yo‘llari bosh agentligida bo‘lib o‘tgan yig‘ilishda agentlik va “Toshkent” aeroportining sotishlar bo‘limi aviakassirlariga ularning faoliyatidagi tegishli qonunbuzarliklar haqida axborot berildi hamda hushyor bo‘lishga chaqirildi.

Aviatashishlar tizimida aviakassirlik eng mas’uliyatli kasblardan biridir. Havo qatnovlari jadvaliga aniq rioya qilinishi va yo‘lovchilarning samolyotdan o‘z vaqtida joy egallashi ularning ishlari qay darajada yaxshi yo‘lga qo‘yilganiga bog‘liq.

Afsuski, aviakassirlar lavozim yo‘riqnomasiga har doim ham rioya qilavermaydi va bu ko‘pincha turli huquqbuzarliklar hamda mansabni suiiste’mol qilish holatlariga olib keladi. Albatta, bu o‘rinda inson omilini ham e’tibordan soqit qilib bo‘lmaydi, lekin amaliyot shuni ko‘rsatadiki, buning orqasida ko‘pincha g‘arazli maqsadlar yashiringan bo‘ladi. “O‘zbekiston havo yo‘llari” milliy aviakompaniyasining havo yo‘llari bosh agentligida o‘tgan yig‘ilishda aynan shular haqida so‘z yuritildi.

“Toshkent” aeroporti transport militsiyasining tergov bo‘limi boshlig‘i U.Abdurahmonovning aytishicha, aviakassirlar ko‘pincha chiptalarni rasmiylashtirishda xatoga yo‘l qo‘yadi. Bu xatolar, birinchi navbatda, kassa xodimlari yo‘lovchilar pasportlarini batafsil o‘rganmasligi sababli yuzaga keladi. Negaki, ayrim hollarda shaxsni tasdiqlovchi hujjatlarning muddati o‘tgan yoki O‘zbekiston Respublikasi Ichki ishlar vazirligi Xorijga chiqish-kelish va fuqarolikni rasmiylashtirish boshqarmasida rasmiylashtiriladigan xorijga chiqish uchun ruxsat berilmagan bo‘ladi.

Masalan, 2010 yilda aviakassirlarning loqaydligi sababli O‘zbekiston Respublikasi Jinoyat kodeksining 223- va 25-moddalariga binoan 85 jinoiy ish qo‘zg‘atilgan. O‘tgan yili huquqni muhofaza qilish organlari tomonidan Ichki ishlar vazirligi Xorijga chiqish-kelish va fuqarolikni rasmiylashtirish boshqarmasida ruxsat etuvchi qaydlarni (stiker) rasmiylashtirish bilan bog‘liq 131 holat qayd etilgan.

Tadbirda bunday holatlar ayanchli oqibatlarga olib kelishi va ularning oldini olish mumkinligi haqida ta’kidlandi. Bunga yaqinda “Toshkent” aeroportida oshqozonida katta miqdordagi narkotiklarni Rossiya Federatsiyasi hududiga olib o‘tishga uringan shubhali shaxslar qo‘lga olingani misol bo‘la oladi.

O‘zbekiston huquqni muhofaza qilish organlari xodimlarining sergakligi tufayli jinoyatchilar hibsga olindi va giyohvandlik vositalarini mamlakatimiz orqali olib o‘tishga chek qo‘yildi. Bu shaxslarning o‘z aybiga iqror bo‘lgani tadbir davomida aviakassirlar e’tiboriga havola qilingan hujjatli filmda namoyish etildi.

Mazkur filmni namoyish etishdan ko‘zlangan maqsad aviakassirlar ushbu yo‘lovchilarning hujjatlarini sinchkovlik bilan tekshirganida, ularning shubhali xatti-harakatlarini sezishi mumkinligini tushuntirishdir. Boz ustiga, bu shaxslar qo‘shni davlatlar fuqarolari edi.

Shu bois tadbir doirasida huquqni muhofaza qilish organlari xodimlari aviakassirlarni doimo ogoh bo‘lish va o‘z vazifalariga mas’uliyat bilan yondashishga chaqirdi. Yaqin vaqt ichida lavozim yo‘riqnomalariga aviakassirlar faoliyati ustidan qat’iy nazorat o‘rnatish va qonunbuzarliklar uchun ma’muriy javobgarlikka tortish ko‘zda tutilgan o‘zgartishlar kiritiladi.

– Biz aviakassirlar ishtirokida tushuntirish tadbirlarini muntazam o‘tkazmoqdamiz, – deydi “O‘zbekiston havo yo‘llari” milliy aviakompaniyasining havo yo‘llari bosh agentligining texnik bo‘limi boshlig‘i Larisa Zaxarchenko. – Shu sababli milliy aviakompaniya kassalari xodimlari o‘rtasida chipta sotish bilan bog‘liq qonunbuzarliklar ancha kamaydi. Ko‘pincha, bunday holatlar xususiy aviakassalarda sodir bo‘lmoqda, ammo ular bilan ham suhbatlar o‘tkazib, ko‘rsatmalar bermoqdamiz. Kelgusida bunday muammolarning oldi olinishiga umid qilamiz.

So‘nggi yangiliklar:

Article source: http://uza.uz/uz/society/20756/

O‘zbekiston Jurnalistlari ijodiy uyushmasining “Yilning eng faol jurnalisti – 2011” tanloviga marhamat!

admin — Tue, 21 Feb 2012 11:57:45 +0000

O‘zbekiston Jurnalistlari ijodiy uyushmasining “Yilning eng faol jurnalisti – 2011” tanloviga marhamat!

21.02.2012 12:43

Hurmatli hamkasblar!

O‘tgan yil yurtimiz hayotida eng ulug‘, eng aziz ayyom – mustaqilligimizning muborak 20 yilligi sanasi sifatida o‘chmas iz qoldirdi. Zero, o‘zining necha ming yillik ko‘hna tarixida ne-ne voqealarni boshidan kechirgan xalqimiz uchun O‘zbekiston mustaqilligi – hayotimizni, ongu shuurimizni tubdan o‘zgartirgan bu ulug‘ sana ko‘p yillar, zamonlar o‘tsa-da, o‘z ahamiyati, qadr-qimmati va mohiyatini yo‘qotmaydigan, tom ma’noda olamshumul voqea bo‘lib abadiy saqlanib qoladi.

“Buyuk va muqaddassan, mustaqil Vatan!” shiori ostida o‘tgan 2011 yilda mamlakatimiz o‘zi tanlab olgan va og‘ishmay ilgarilab borayotgan taraqqiyot yo‘lidan yana bir dovon oshdi. Mustaqillik deb atalgan bebaho ne’mat, xalqimizning fidokorona mehnati, uning tobora yuksalib borayotgan tafakkuri, ertangi kunga bo‘lgan ishonchi, ezgu orzu-intilishlari mahsuli bo‘lgan yutuq va muvaffaqiyatlarimiz jahon hamjamiyati tomonidan yanada keng e’tirof etildi.

20 yillik manzaralar, taraqqiyotning o‘zbekona yo‘li, tarix va istiqbol kesishgan chorrahalar, milliy qadriyatlarimiz rivoji, xalqimiz hayotidagi yangilanishlar, xususan, “Kichik biznes va xususiy tadbirkorlik yili” Davlat dasturi doirasida iqtisodiyot va xalq farovonligini yuksaltirish yo‘lida amalga oshirilgan ishlar ommaviy axborot vositalari faoliyati va jurnalistlar ijodida ustuvor o‘rin tutdi.

Aziz hamkasblar, O‘zbekiston Jurnalistlari ijodiy uyushmasi sizlarni “Yilning eng faol jurnalisti – 2011” tanlovida qatnashishga taklif etadi. Tanlovga 2011 yilning 1 iyunidan 2012 yilning 1 iyunigacha gazeta va jurnallarda, internet nashrlarida e’lon qilingan materiallar, efirga uzatilgan teleko‘rsatuv va radioeshittirishlar qabul qilinadi.

Materiallar tanlovga tahririyatlar tavsiyasi bilan O‘zbekiston Jurnalistlari ijodiy uyushmasining Qoraqalpog‘iston Respublikasi va viloyatlar bo‘limlari orqali joriy yilning 5 iyunigacha muallifning ish joyi, telefoni, manzili haqidagi ma’lumotlar va pasport nusxasi ilova qilingan holda taqdim etilishi lozim.

“Yilning eng faol jurnalisti – 2011” tanlovi g‘oliblari va sovrindorlariga diplom hamda qimmatbaho sovg‘alar Matbuot va ommaviy axborot vositalari xodimlari kuniga bag‘ishlab 27 iyunda o‘tkaziladigan bayram tadbirida topshiriladi.

Materiallar “Yilning eng faol jurnalisti – 2011” tanloviga deb ko‘rsatilgan holda quyidagi manzilga yuborilishi lozim:

100129, Toshkent shahri,
Navoiy ko‘chasi, 30-uy.
O‘zbekiston Jurnalistlari ijodiy uyushmasi
3-qavat, 30, 35, 37-xonalar
Telefonlar: 244-64-61; 244-64-62; 244-37-87.
www.Journalist.uz

So‘nggi yangiliklar:

Article source: http://uza.uz/uz/society/20758/

Til – millat ko‘zgusi

admin — Tue, 21 Feb 2012 11:57:44 +0000

Til – millat ko‘zgusi

O‘zA, Nazokat Usmonova, 21.02.2012 12:55

Prezidentimiz Islom Karimov rahnamoligida ta’lim sohasida amalga oshirilayotgan keng ko‘lamli islohotlar yoshlarni yuksak ma’naviyatli, bilimli, sog‘lom va teran tafakkur sohiblari etib tarbiyalashdek ulug‘vor maqsadlarga xizmat qilmoqda. O‘zbekistonning bu boradagi tajribasi xalqaro miqyosda ham namuna sifatida e’tirof etilmoqda.

Davlatimiz rahbari tashabbusi bilan Toshkent shahrida 16-17 fevral kunlari “Yuksak bilimli va intellektual rivojlangan avlodni tarbiyalash – mamlakatni barqaror taraqqiy ettirish va modernizatsiya qilishning eng muhim sharti” mavzusida o‘tkazilgan xalqaro konferensiyada bu yana bir bor o‘z tasdig‘ini topdi.

Toshkent viloyatining Parkent tumanidagi 1-umumiy o‘rta ta’lim maktabida O‘zbekiston Respublikasi Xalq ta’limi vazirligi, Respublika ta’lim markazi hamkorligida tashkil etilgan “Til – millatning birligi va borligi ko‘zgusi” mavzuidagi seminarda shular haqida so‘z bordi. 21 fevral – Xalqaro ona tili kuni munosabati bilan o‘tkazilgan ushbu tadbirda ta’lim fidoyilari, uslubchilar, tilshunos olimlar, ma’naviyat targ‘ibotchilari, o‘quvchilar ishtirok etdi.

Seminarda ta’kidlanganidek, bugungi shiddatli zamon talablariga to‘liq javob beradigan, yuqori bilim va malakali, milliy va umumbashariy ezgu an’analar ruhida kamol topgan avlodni voyaga yetkazish mamlakatimizda ma’naviy-ma’rifiy sohalarda amalga oshirilayotgan tub islohotlarning asosiy mazmun-mohiyatini tashkil etadi. Ta’lim va tarbiyaning o‘zaro uyg‘unligi, o‘qitishning uzviy, bosqichma-bosqich tarzda amalga oshirilishi, xalqimizning milliy mentalitetiga hamohangligi, insonparvarligi milliy ma’rifiy modelimizning ustuvor tamoyillaridir.

Mamlakatimizda ona tilimiz – o‘zbek tilini rivojlantirish, uning sofligini saqlash bilan birga, o‘quv muassasalarida yoshlarga puxta o‘rgatish orqali o‘quvchilar qalbi va ongida Vatanga muhabbat, istiqlol g‘oyasiga sadoqat, milliy an’ana va qadriyatlarimizga hurmat tuyg‘usini mustahkam qaror toptirishga alohida e’tibor qaratilmoqda. Bularning barchasi “Ona tili”, “Adabiyot”, “O‘zbek tili”, “Vatan tuyg‘usi”, “Odobnoma”, “Milliy istiqlol g‘oyasi va ma’naviyat asoslari” singari fanlar orqali yoshlarga puxta o‘qitilmoqda. Mamlakatimizda ta’lim o‘zbek, qoraqalpoq, turkman, qozoq, tojik, qirg‘iz, rus tillarida olib borilayotir. Har yili mazkur tillarda ikki yuzdan ortiq nomdagi darsliklar, o‘quv qo‘llanmalari nashr etilib, joylarga yetkazib berilayotir.

Parkentdagi to‘liq kapital ta’mirlangan 1-umumiy o‘rta ta’lim maktabida qariyb olti yuz nafar o‘quvchi bilim oladi. Ona tilimiz va bir necha xorijiy tillarni puxta o‘zlashtirish uchun zarur sharoitlar yaratilgan. “ZiyoNET” jamoat ta’lim axborot tarmog‘iga ulangan zamonaviy axborot-resurs markazi, lingafon kabinetlari, kompyuter sinfxonalari o‘quvchilar ixtiyorida.

Seminarda tilshunoslikka doir o‘quv adabiyotlarini yaratishning dolzarb masalalari xususida atroflicha so‘z yuritildi.

So‘nggi yangiliklar: