Ижтимоий ҳимояга муҳтож аҳоли қатламига ёрдам бериш, ҳар томонлама қўллаб-қувватлаш, соғлом авлодни тарбиялаш борасидаги ишларда нафақат давлат ташкилотлари, балки нодавлат ташкилотларининг ҳам алохида ўрни бор. “Соғлом авлод учун” ҳалқаро хайрия фонди ҳам оналар ва болалар саломатлигини мустаҳкамлаш, кам таъминланган оилалардаги бемор болаларни ижтимоий ва тиббий жиҳатдан қўллаб-қувватлаш борасида муҳим ишларни амалга ошириб келмоқда. Шу мақсадда, Фонд томонидан бемор болаларни чет элдаги нуфузли клиникаларида даволаш махсус дастури ишлаб чиқилган.
Ҳар қандай миллатнинг асосий бойлиги – оналар ва болалар саломатлигидар. Шундай экан, оналик ва болаликни муҳофаза қилиш миллат келажагини муҳофаза қилиш билан баробардир. Ўзбекистон Республикаси Президентининг 2022 йил 28 январдаги 60-ПФ фармони билан “Инсон қадрини улуғлаш ва фаол маҳалла йили” Давлат Дастури тўғрисидаги Қарори эса бошланган хайрли ишларни янада жадаллаштиришга сабаб бўлмоқда.
2002 йилда “Соғлом авлод учун” халқаро ҳайрия фоди, Ўзбекистон Республикаси Соғлиқни сақлаш вазирлиги, Германиянинг “Фриеденсдорф Интернейшнл” халқаро ташкилоти билан уч томонлама ҳамкорлик битими имзоланган эди. Германиянинг “Фриеденсдорф Интернейшнл” халқаро ташкилоти 1967 йили ташкил топган бўлиб, дунёдаги 30 дан ортиқ давлатлар билан ўзаро хамкорлик қилади. Ҳамкорлик доирасида ривожланаётган мамлакатлардаги 12 ёшгача бўлган бемор ва ногирон болаларни даволаш ва реабилитация қилиш билан шуғулланадилар.
Германиянинг “Фриеденздорф Интенрнейшнл” халқаро ташкилоти грант маблағлари ҳисобига 2021 йилда Республика бўйича лаб танглай туғма нуқсони, ортопедик оёқ ва бўйин нуқсони бўлган ҳамда куйишдан кейинги тананинг нуқсонлари бўлган 217 нафар болалар операция қилиб соғломлаштирилди.Сарф харажатлар 113,7 млн. сўмни ташкил этди.
Шунингдек, аҳолининг ижтимоий ҳимога муҳтож қатламларидан 123 нафар юрак туғма нуқсони билан бемор болаларда республикамиз клиникаларида жарроҳлик операциялари ўтказилди. Жами харажат 654,4 млн. сўмни ташкил этди. Бугунги кунда мазкур барча дастурлар республикамиз клиникаларида самарали давом эттирилмоқда.
Фонд томонидан Германиянинг “Фриеденздорф Интенрнейшнл” халқаро ташкилоти билан ҳамкорлик доирасида ўтган давр мобайнида 416 га яқин бемор болалар Германия клиникаларига даволанишга юборилди. 2022 йилнинг 9 май куни соат 20.50да И.Каримов номли Тошкент халқаро аэропортида узоқ муддатли даволаниш курсларини ўтаган 11 нафар ўзбекистонлик бемор болалар Германиялик мутахассислар ҳамроҳлигида юртимизга қайтиб келиши ва ота-оналарига топширилиши режалаштирилган. Бугунги кунда 5 нафар ўзбекистонлик бемор болалар Германия клиникаларида даволанишни давом эттирмоқда.
Шунингдек Германиялик мутахассислар жорий йилнинг 9-16 май кунлари республикамиз вилоятларида (Тошкент шаҳрида- 10 май, Бухоро шаҳрида – 11 май, 12-13 май кунлари – Қарши шаҳрида, 14 май куни – Самарқанд шаҳарларидаги вилоят кўп тармоқли болалар тиббиёт марказларида) бўлиб, бемор болаларни тиббий кўрикдан ўтказиб, Германия клиникаларига даволаш учун танлаб олишни режалаштиришган.
“Соғлом авлод учун ” фонди ана шундай хайрли ишларни ташкил этишида яқиндан ёрдам бераётган барча ҳомий ташкилотлар, оммавий ахборот воситалари ходимларига ўз миннатдорчилигини билдиради ва келажакдаги ҳамкорликка чорлайди.
